Foi construida a finais do século XVIII con factura neoclásica sobre estrutura orixinal de época románica, aínda presente no presbiterio e nos contrafortes exteriores entrelazados con arcos de medio punto.

Non obstante o máis salientable da construción son as pinturas góticas da ábsida que permaneceron ocultas durante anos detrás do altar. Nelas represéntanse tres escenas da paixón e morte de Cristo: Camiño do Calvario, a Crucifixión e a Piedade ou Virxe das Angustias.

Interesantes tamén os retablos rococós da Virxe do Rosario e do Neno Xesús de finais do século XVIII. No seu adro atopamos a Casa da Fábrica de 1888 e, na súa contorna, dous cruceiros de varal cun S. Francisco en baixo relevo.