Construída no século XVII, a igrexa parroquial consta dunha soa nave con arco de triunfo sobre pilastras de acceso ao presbiterio e sancristía. A fachada presenta porta de ingreso de medio punto, de grandes dobelas, e espadaña dun corpo con aletóns servindo de asento a pináculos, rematada por frontón. O retablo obedece á mesma cronoloxía. Organízase en dous corpos, base con relevos dos Evanxelistas pareados e ático coa Trinidade. As tres rúas distribúense mediante estípites, cubrindo os marcos unha decoración vexetal de fino talle.