Edificio de estilo colonial, de comezos do século XX (1916), moi propio da arquitectura indiana con fins educativos; é dicir, trátase dunha construción levada a cabo por iniciativa dos emigrantes que foran a América e retornaran á súa terra natal cunha mentalidade altruísta. Na súa planta rectangular desenvólvense dous corpos diferenciados. O rechamante aspecto exterior do edificio invita a entrar neste. Tanto os vans como os elementos ornamentais están pintados de verde. Na fachada destaca un lintel no que figura a denominación e data de construción do edificio. Ampla cuberta a dúas augas.