Capela construída no segundo terzo do s. XIX polo monxe Fray Benito Haza, enterrado no cemiterio de San Roque da parroquia de Meira. Este monxe exclaustrado do antigo mosteiro de Santa María de Meira tras a desamortización de Mendizábal era o cura da igrexa monasterial.

A capela está fabricada con muros de cachotaría de lousa, caleados, e con cuberta de lousa a tres augas. É de planta rectangular. Frontis con porta alintelada, pequeno ventanal rectangular e espadana de dobre corpo e un só van. Interior: retablo neoclásico da segunda metade do século XIX con esculturas da mesma época da Virxe do Carme, Santa Rita e San Isidro. Ao lado desta capela atópase a “Casa de Bravo” ou “Casa de Casoa”, restaurada así coma a Fonte de Paredes e lavadoiro.

Celébrase romaría o 15 de maio coa celebración do San Isidro.