Edificio proxectado en 1920 por Manuel Gómez Román. É unha construción sinxela, cunha planta baixa, tres altas e unha torre sobre o chafrán. Ten grandes ventás que comprenden dúas plantas e están separadas por pilastras. A entrada do edificio está situada no chafrán e enmárcase entre un arco de medio punto e os símbolos representativos de correos. Sobre estes dispóñense dous corpos laterais con tres grandes vans e no último piso unha cornixa e un ático cun óculo. Foi construído polo contratista Vicente Calderón e é dun sobrio clasicismo con mínima decoración.