Edificio proxectado en 1898 por Benito Gómez Román e pertencente á súa familia. Ten unha gran fachada simétrica, unha planta baixa e tres altas, aínda que posteriormente se lle engadiron dúas grandes ventás laterais. Emprega pilastras lixeiras, resaltadas para dividir a fronte en cinco corpos na primeira e segunda planta. Como decoración ten pilastras que se individualizan con diferente decoración nos linteis dos vans; balcóns individuais pero a distinto nivel, sobresaíndo uns máis ca outros; e elementos decorativos minuciosos como acanaladuras, palmetas, profundas incisións na pedra, debuxos naturalistas e xeométricos, etc.