mailto:?subject=Envio de contido de Turismo de Galicia: CULLER DE PAU&body=Recoméndoche que leas a información CULLER DE PAU extraída do portal de Turismo de Galicia na páxina https://www.turismo.gal/recurso/-/detalle/265569693/culler-de-pau?ctre=142%26langId=gl_ES%26tp=24
CULLER DE PAU
Datos do recursos turístico
Localización
Rúa Reboredo 73
36989 O Grove - Pontevedra
Contacto para reservas
Descrición
Defensor da gastronomía como transmisora de cultura, Javier Olleros lidera, xunto a Amaranta Rodríguez, o seu proxecto materializado en Culler de Pau. Na contorna rural do Grove e a escasa distancia do mar sitúase este restaurante, cuxa horta converteuse nun corazón do que bombea a inspiración, o coñecemento e a aprendizaxe que alimentan a un equipo en procura constante das raíces.
A actividade diaria comeza cedo coa recolección, de entre máis das trescentas especies, de herbas para infusionar e dos vexetais solicitados en cociña. Entre o canto dos paxaros rebolen multitude de cheiros, moi concentrados no invernadoiro, cuxa estrutura de madeira e cristal acubilla unha longa mesa de traballo que se converteu no complemento perfecto para desenvolver o I+D do restaurante. Mentres, o chef visita o mercado e non renuncia ao trato próximo con vendedores, mariñeiros, mariscadores ou agricultores.
Este compromiso coa sostibilidade amplíase co tratamento do seu propio compost cos residuos xerados, así como coa colaboración e intermediación entre agricultores e a Misión Biolóxica de Galicia, centro investigador que traballa na conservación e mellora de variedades de cultivos autóctonos como o millo corvo ou o chícharo bágoa. Neste aspecto, dende Culler de Pau consideran a educación como punto crave para implicar á sociedade na toma de conciencia individual e colectiva.
A arquitectura do edificio do restaurante reflicte un estilo minimalista que destaca o traballo de deseñadores galegos como Arturo Álvarez, ao redor da iluminación, ou o de artesás como Verónica Moar, na elección das pezas da vaixela.
A sala é un miradoiro á ría de Arousa, despensa cunha biodiversidade case infinita. Nela sérvense tres menús, Descuberta, Marexada e Ronsel, onde se enxalzan os vexetais, traballados baixo a dirección do xefe de cociña Takahide Tamakama como un reto creativo e aos que se lles outorga a mesma importancia que a recursos de maior valor económico, como mariscos, peixes ou carnes que completan a oferta.
As propostas culinarias deséñanse como unha forma máis de coñecer O Grove, tanto dende o punto de vista gastronómico, como patrimonial, natural ou etnográfico. As experiencias gustativas adáptanse á estación, á organicidade da horta e á oferta dos provedores locais. Os menús, equilibrados e saudables, buscan o goce dos comensais, aderezado cunha aprendizaxe amena.
A Olleros apaixónalle a súa profesión e a súa terra, onde enraizou a súa proposta fai uns quince anos. O compromiso con ambas é a súa forma de situarse e é habitual que el e o seu equipo vistan camisetas con frases como Mariñeiro da horta ou Intérprete do territorio, filosofía que marca o camiño de Culler de Pau.
Camiños de Santiago
Estrelas Michelin
Soles Repsol
Accesibilidade
Grao de Accesibilidade: Practicable
