Edificio proxectado por Manuel Gómez Román en 1919-1923. Neste edificio mantense un moderado modernismo "sezesionista vienés" con elevadas formas prismáticas que sobrepasan a liña da cornixa e se decoran con coroas, grilandas verticais e cubos con motivos vexetais. A forte molduración da planta baixa e a cornixa proporcionan horizontalidade, mentres que o elevado chafrán con cúpula lle dá verticalidade conseguindo monumentalidade. A iluminación proporciónana amplas ventás entre columnas con base, fuste con aneis, capitel toscano e arquitrabe.