Capela de estilo neoclásico. A xunta da Venerable Orde Terceira de San Francisco decidiu levantar para o seu propio uso un pequeno recinto relixioso pegado ao muro Norte da igrexa conventual formando conxunto con ela. O arquitecto foi Pedro Lizardi, rematando as obras en 1766. Planta rectangular a única nave da cal esta delimitada por muros lisos. Tripla compartimentación e diferente morfoloxía das bóvedas (canón e vaídas), as cales se montan sobre arcos que arrancan de pequenas ménsulas pegadas á parede. Fachada principal en cadeirado, algo pouco común en Ferrol. Esta dividida en tres rúas, as laterais lisas e a rúa central aloxa a porta de acceso e o óculo ovalado. Posúe unha estruturación superposta de pilastras, dóricas, con frontón triangular, as do corpo inferior, que enmarcan o acceso, e xónicas, con frontón curvo, as do superior. Toda a fronte cunha cornixa de suave voada, floreiros nas esquinas e espadaña central dun só van semicircular.