O respecto polo traballo dos herdeiros da Panadería Pallares, un dos establecementos máis emblemáticos e con máis tradición de Sarria, así como o legado das xeracións anteriores, incentivou a paixón por conservar e restaurar os utensilios empregados desde as súas orixes no ano 1876. No museo móstranse fotos, maquinarias e un conxunto de recordos que nos transportan ao pasado, facendo deste espazo un lugar cheo de historia para deleite de clientes e visitantes.