Situado na pintoresca Praza da Leña, dende onde antigamente distribuíase a madeira que servía para alimentar cociñas e chemineas, O Eirado converteuse por méritos propios nos seus vinte anos de traxectoria nunha destacada referencia da oferta gastronómica da cidade de Pontevedra e de Galicia.

    A media mañá, ao abrir a porta desta tradicional casa de pedra percíbese o cheiro do pan recentemente enfornado, a primeira preparación que se afronta diariamente na cociña. A masa, para a que se empregan distintas fariñas galegas, fermenta durante 48 horas, e é o propio chef Iñaki Bretal quen a traballa.

    Este cociñeiro lidera un equipo ao que outorga confianza e ao que recoñece como o corazón que impulsa este proxecto, con Raquel Fernández como catadora. Sen tradición culinaria na familia, lembra que xa de neno admiraba a boa e imaxinativa cociñeira que era a súa nai e a dureza do día a día de quen sae a faenar, xa que o seu pai foi mariñeiro. Criado entre o País Vasco e Galicia, son os recursos marítimos galegos os que o inspiran e dos que se nutre ao redor do 80 por cento da súa proposta gastronómica.

    Durante a semana, Bretal acode varias veces á lonxa de Santa Uxía de Ribeira, situada no principal porto de baixura español, a elixir o peixe e o marisco co que traballará. Considera fundamental este contacto directo para conseguir un produto que enxalza nas súas receitas, fuxindo de acompañamentos que o enmascaren, que se poden degustar nos menús Curricán e Palangre. Defensor da riqueza incomparable que ofrece o territorio galego a cociñeiros e consumidores, este cociñeiro estraña non poder ter unha horta anexa ao restaurante, aínda que o mercado de abastos veciño e algúns cultivos do seu pai axudan a suplir esta carencia.

    A cambio, a súa céntrica localización propicia a chegada dunha clientela moi variada, enriquecida nos últimos anos polos peregrinos que fan o Camiño Portugués, que aproveitan a súa escala en Pontevedra para degustar, grazas a O Eirado, a alta gastronomía galega que, como apunta Bretal, vive actualmente un merecido recoñecemento.