Igrexa construída entre os séculos XII e XIII con engadidos barrocos. É de planta rectangular con ábsida cuadrangular na cabeceira. Esta está cuberta con bóveda estrelada e a nave principal con falsa bóveda de canón rebaixada. A cuberta, en tella, é a dúas augas. Os muros son de cachotaría en granito, excepto a fachada e a torre que son de cantería. A sancristía, cuadrangular, é un engadido a continuación da ábsida. A fachada principal ten unha portada rectangular, posiblemente maior que a orixinal, xa que desborda o orixinario arco de medio punto enmarcado por xambas e con decoración floral nas arquivoltas. Sobre a porta, un dosel en forma de cuncha coa imaxe da Virxe con Cristo nos brazos. A continuación ábrese un pequeno rosetón. A torre, no lateral sur da fachada, é de planta cadrada e componse de tres tramos, o primeiro totalmente liso (século XIII), e os dous últimos de estilo barroco. Remata cunha pequena cúpula.