Templo  de unha soa nave con varios engadidos. A parroquia de Noceda aparece en documentos do século X pero é probable que os vestixios románicos que aínda conserva sexan de finais do século XII. Aínda que reformado, o testeiro conserva unha fiestra con capiteis con aves esculpidas. No interior pode verse  unha fornela para a que se aproveitaron columnas e capiteis da fábrica orixinal; tamén podemos ver dous capiteis, orixinarios do arco triunfal, con bestas mitolóxicas talladas facendo de base do altar; a pía bautismal sería así mesmo do mesmo período. Unha das capelas laterais, de estilo gótico presenta sepulturas da casa de Golmar; destaca a estatua de Gonzalo Taboada e Ulloa, coas armas dos Taboada e os Deza.