A igrexa forma parte dun conxunto maior constituído polo pazo e a torre de San Miguel de Penas. Un corredor une o pazo coa parte alta da igrexa.

O templo era orixinariamente románico, do século XII, aínda que sufriu reformas posteriores como a da espadana, a sancristía ou a ábsida. A nave é rectangular e a sancristía e a ábsida cadradas. Os muros que a conforman son de cachotería e cantería de granito e a cuberta de tella a dúas augas.

A portada principal é de medio punto, con arquivoltas con columnas acobadadas, fustes dunha peza e capiteis. O tímpano é alintelado, con mochetas de motivos sinxelos. Tamén románica é a porta sur, moi alta e estreita, con arco interior apuntado e oculto cara a fóra por un lintel.

O arco triunfal presenta lixeiro peche no arranque, con dúas arquivoltas de aresta e capiteis esquemáticos. Son abundantes os canzorros que se conservan no beirado.

No piso da igrexa hai tres laudas sepulcrais, das cales unha ten o escudo coas armas dos Taboada. A imaxe pétrea de san Miguel, algo posterior á data de edificación da igrexa, desapareceu.

A portada está rematada cunha espadana barroca de dous vans. No interior consérvase unha pía bautismal do alto medievo.