Igrexa que recibiu importantes reformas nos últimos séculos, perdendo a súa imaxe exterior románica ao lle ser elevada a ábsida e serlle construída unha sancristía. Tamén a porta principal se viu reformada, pois presenta un exemplar alintelado no que en orixe era un arco.  A nave é rectangular.

Os muros son de cachotería e cantería de granito, e a cuberta é de tella a dúas augas. Conserva restos románicos no arco triunfal de medio punto. No frontis presenta ollo de boi de grandes dimensións e espadana dun só van. No beirado hai algúns canzorros e, nos muros, restos de inscricións nalgúns perpiaños.