Ten planta rectangular con cuberta a dúas augas resolta en lousa. Na fachada ten un adro cuberto soportado por columnas de pedra de sección cadrada. Sobre o mesmo ten un pequeno campanario cun só van. A capela maior sobresae do conxunto e está resolta con cuberta a catro augas.  Ten unha sancristía na cabeceira e outra acaroada ao alzado norte do presbiterio. A torre das campás, exenta, é cadrada con porta na primeira planta, catro vans para as campás na segunda e cúpula de pedra no coroamento. O retablo maior é neogótico con esculturas de San Roque,  Santo Antonio e San Pedro do século XVII. Os retablos laterais son neoclásicos. Na igrexa atópanse dous óleos que representan dous milagres da vida de Santo Antonio do século XVII.