mailto:?subject=Envio de contido de Turismo de Galicia: PARQUE NACIONAL MARÍTIMO TERRESTRE DAS ILLAS ATLÁNTICAS DE GALICIA&body=Recoméndoche que leas a información PARQUE NACIONAL MARÍTIMO TERRESTRE DAS ILLAS ATLÁNTICAS DE GALICIA extraída do portal de Turismo de Galicia na páxina https://www.turismo.gal/recurso/-/detalle/16424/parque-nacional-maritimo-terrestre-das-illas-atlanticas-de-galicia?langId=gl_ES%26tp=1%26ctre=1
PARQUE NACIONAL MARÍTIMO TERRESTRE DAS ILLAS ATLÁNTICAS DE GALICIA
Atlántica maxestade Navegar cara ao poñente é unha das grandes
aventuras do litoral galego. Existen as illas galegas,
estes son os seus nomes: Cíes, Ons, Sálvora e
Cortegada. Palabras arquipélago de augas o
bastante turquesa e area suficientemente branca
para evocar praias caribeñas... “ata que metes un
dedo na auga”. Isto afirma como mérito o diario
"The Guardian" ao considerar o areal de Rodas nas
Cíes como o mellor do mundo. Augas frías coas
mellores propiedades do océano para a vida
submarina e historias singulares de pecios
afundidos.
Dende o barco da ría de Vigo albíscase a liña do contorno de tres illas que xogan a ser dúas. Son coñecidas como as Cíes porque seguimos a nomealas polo alcume romano de Siccas, ás illas
secas, aínda que ningunha por separado se chame así. A do norte ou do Monteagudo e a do medio ou do Faro únense polo finísimo areal de Rodas e un lago que completa a estampa paradisíaca. A illa
do sur ou de San Martiño permanece afastada das outras por unha canle chamada Freu da Porta. O arquipélago abrangue ademais unha serie de illotes que se unen baixo a superficie nuns fondos de
enorme e fráxil biodiversidade, dende a beleza microscópica nos prados de algas ata a grandiosidade dos cetáceos que non é raro observar.
Ons e a súa irmá Onza ou Onceta e o illote das Freitosas pechan a ría de Pontevedra cunha liña de costa perfilada con area de praias. Pola contra, a parte non visible desde terra é extremadamente
agreste e propicia para a formación de furnas e cons. A paisaxe submarina desta cara oceánica fórmana paredes verticais ateigadas de vida grazas ó afloramento de augas profundas ricas en
nutrientes. Soubérono ben os habitantes desta illa, a única actualmente poboada do Parque Nacional, dedicados á pesca entre a que salienta a captura do polbo.
Sálvora, no extremo occidental da ría de Arousa,
con toda a súa constelación de illas cargada de
lendas e historias mariñeiras como as pequenas
Noro, Vionta e Sagres, é a reserva total en fondo e
superficie. Ao igual que nas anteriores Cíes e Ons,
o paso do home deixou a existencia de edificacións
humanas de uso relixioso (capelas, altar ou igrexa),
civil (faros), militar (fortalezas) e industriais. En
Sálvora a salgadeira converteuse en pazo con dúas
torres e achamos ademais unha aldea de fermosa
fasquía tradicional con oito hórreos e capela.
Cortegada e as veciñas Malveiras gozan da
proverbial riqueza biolóxica do mar interior de
Arousa. Para observarmos a actividade produtiva o
peirao e paseo de Carril ofrecen boas leccións de
marisqueo cos seus parques de cultivo de ameixa e
berberecho. As mareas son a única fronteira da illa
de Cortegada que semella conquistable a pé. En
ocasións realízanse visitas guiadas que ademais da
historia insular amosan tras o seu espeso piñeiral o
tesouro vexetal que representa o bosquete de
loureiros con exemplares de ata doce metros de
altura.
Acceso
Servizo regular de transporte marítimo de pasaxeiros a Cíes e Ons en tempada alta (Semana Santa, fines de semana de maio e no verán). Na tempada baixa e para Sálvora e Cortegada durante todo o ano non hai transporte regular, operan navieras autorizadas que ofrecen o transporte e visita guiada segundo os requisitos de cupos e ratios por guía establecidos nas autorizacións.
Camiños de Santiago
Camiño Portugués da costa
Ruta do Mar de Arousa e Ulla
Situación
Nas Rías Baixas. Componse de catro arquipélagos que son Cortegada e Sálvora na ría de Arousa, Ons fronte á ría de Pontevedra e Cíes cerrando a ría de Vigo. Concellos de Vilagarcía, Bueu e Vigo na provincia de Pontevedra e Ribeira na provincia de A Coruña.
Superficie
8.480 ha (1.194,80 ha terrestres e 7.138 ha
mariñas).
En concreto: Cíes (2.658 ha mariñas e 433 ha
terrestres), Ons (2.171 ha mariñas e 470 ha
terrestres), Sálvora (2.309 ha mariñas e 248
ha terrestres) e Cortegada (147,2 ha mariñas e 43,8 ha terrestres).
Servizos
Aloxamento: só nas Cíes e Ons.
Comida: só Cíes e Ons contan con servizos de restauración.
Sen pérdida
Non circulan vehículos por ningunha das illas que forman o Parque Nacional. Ademais, outro aspecto que debemos ter en
conta é o control de lixo. Os visitantes deberán responsabilizarse dos envases e residuos que transporten ás illas, xa que nas illas NON hai papeleiras.
Nas Cíes o acceso controlado a un número máximo 1.800 persoas diarias garanten a tranquilidade. Desde o embarcadoiro
de Rodas resulta doado achar os percorridos principais a cada un dos tres faros existentes. Trátase de rutas de dificultade
media, un pouco esixentes en días de calor e nalgúns treitos de ascenso. Porén, maior será a recompensa paisaxística.
Unha das máis recomendadas é subida en zigzag ao Monte Faro, a unha distancia de 7 km entre ida e volta desde o peirao. Neste traxecto atoparemos o desvío que nos leva ata a A Campá, unha auténtica ventá labrada en pedra, así como ao observatorio de aves, lugar dende onde poderemos observar sen molestar ás miles de gaivotas patiamarelas que anidan nos cantís das illas.
Na illa de Ons o visitante atopará desde o peirao a praia e o poboado do Curro de onde parte unha longa ruta con varias
posibilidades. Subirmos ao miradoiro do Faro entre as construcións dos “illáns” ou ben ir cara ao norte e situármonos na
solitaria e fermosa praia de Melide. Cara ao sur, por diferentes carreiros chegaremos ao miradoiro de Fedorentos pasando
polo Buraco do Inferno, unha furna con forma de pozo onde se escoita o bruar do mar desde as entrañas da terra.
Os billetes de embarque emítense co regreso pechado en día e hora para a cota de visitantes establecido en cada
arquipélago. Non existe transporte regular para saltar dunha illa a outra, pero pódense contratar cruceiros turísticos para
visitar en conxunto os ecosistemas das rías.
Natureza senlleira
En todas as illas existen zonas de reserva para a cría de aves mariñas que o visitante deberá respectar.
Os sistemas naturais representativos do parque son as zonas costeiras e a plataforma continental atlántica. A vida
vexetal está condicionada polos ventos cargados de salitre. A flora máis representativa atópase en cantís e dunas.
Abundan as toxeiras; e as rarezas do parque son a camariña, a xesta de Ons e as flores chamadas paxariños da
Linaria arenaria. Gran parte dos animais terrestres tamén dependen do mar. Numerosas colonias de aves,
principalmente de gaivota de patiamarela e corvo mariño cristado. No mar, posibilidade de avistamento de cetáceos
coma o rorcual común que no verán frecuentan estas augas. Ademais, no medio mariño son importantes as
comunidades de algas pardas.
Información e equipamentos
Casetas de Información en Cíes, Ons e Cortegada
Centro de Visitantes de Ons e Centro de Información en Cíes