Entre Corme e Ponteceso esténdese unha franxa costeira coñecida pola bravura do mar. Tamén é a terra do poeta Eduardo Pondal cuxa inspiración foi alimentada polos asombrosos lugares que percorren este sendeiro.

O itinerario presenta dúas opcións: un percorrido costeiro ou unha alternativa interior pola variante PR-G 148.1.  Seguindo a ruta principal a senda avanza polas praias de Arnela, Osmo e Ermida ata o lugar onde se atopa Pedra da Serpe, unha única e misteriosa figura pétrea con forma de serpe alada xacendo baixo unha cruz.

Continúa ata a praia de Balarés e segue ata Monte Branco onde as augas do río Anllóns se xuntan co mar formando unha barra de area entre os illotes Tiñosa e Dos Cagallóns.

Pola variante interior (PR-G 148.1) ascenderemos un monte suave para contemplar a Ría de Corme e Laxe.

Ambos percorridos vólvense unir para descender e cruzar o dique, un espectacular muro que atravesa a desembocadura do río Anllóns construído hai 50 anos para desecar o terreo e cultivar millo. Hoxe en día é unha zona húmida de grande importancia ornitolóxica incluída dentro do L.I.C. e da Z.E.P.A. Costa da Morte.

Saíndo do dique, tras un breve tramo de 500 m chegaremos a Ponteceso. O final da ruta atópase xunto á casa do poeta Eduardo Pondal.