Linde natural e administrativo entre os concellos de Lousame e Rianxo, o monte Treito ou Muralla constitúe un magnifico punto de observación a medio camiño entre a contorna da serra do Barbanza e as Rías Baixas.

Dende a súa atalaia rochosa, as ondulacións formadas polos pequenos regatos que descenden cara as rías conforman exiguos vales ocupados por aldeas que contan cos seus coidados campos de cultivo como é o caso de A Varela, Bustelo ou Vilar, todas elas cara ao sur do miradoiro e en primeiro termo.

Na media distancia, nunha ollada panorámica de 180 grados cara ao oeste, preséntase unha espléndida vista das rías de Arousa e Muros e Noia.