A capela de San Paio, situada nunha fermosa paraxe natural de ribeira, preto da fervenza de Entrecruces, é das máis antigas do noso termo municipal. O máis destacado desta capela, datada no s. XVI, é a súa bóveda de cruzaría, tan característica do gótico, cos seus arcos cruzados en forma de estrela dividida en oito partes. Aínda que o gótico é propio do baixo medievo, esta igrexa é posterior, o que demostra a prolongación deste estilo en Galicia. O seu retablo, renacentista, é tamén excepcional, pois a maioría das igrexas e das capelas galegas son barrocas. Recentemente restaurado, parece ser que ten unha antigüidade de ao menos 400 anos e conta aínda con outra curiosidade pouco habitual: unha pintura sobre táboa. 

O estilo renacentista tamén se aprecia na porta da súa fachada, con arco de medio punto contorneado por doelas, que é como se lle chama a cada unha das pedras que conforman os arcos. 

Esta capela acolle, todos os 15 de xaneiro, unha concorrida romaría, moi coñecida polas persoas das parroquias veciñas, con cancións para as e os romeiros. Mesmo existe a muiñeira de San Paio de Entrecruces.