É a conformación máis común en todas as casas ricas da Limia. Consta dunha edificación principal de planta rectangular, cuberta a dúas augas e dúas alturas. Efectivamente, este tipo de vivendas de desenvolvemento lineal adoitan utilizar este tipo de solución volumétrica para ordenar o espacio privado das súas casas. Estas, constitúense como unha sorte de complexo agro-residencial que evidencia cal é a principal actividade económica dos seus habitantes: a actividade agro-gandeira.
Esta vivenda, situada entre medianeiras, aparece levantada en perpiaño granítico de óptima calidade (opus quadratum). De grandes dimensións, os seus muros presentan unha secuencia de vanos asimétrica con xanelas de tres batentes. O interior da edificación conta cun patio aberto destinado ao resgardo da carruaxe e das cabalerías.