Vivenda de dúas alturas de desenvolvemento lonxitudinal construída entre medianeiras que aparece constituída por unha serie de bloques edilicios de distinta tipoloxía e tamaño.
Presenta unha das conformacións máis comúns nas casas rectorais en todo o termo municipal de Rairiz de Veiga e a súa comarca. Consta dunha edificación principal de planta rectangular –maiormente a de altura máis elevada- de dúas alturas (a solución máis habitual) ao pé da que se constrúen un ou dous corpos edificatorios –as máis das veces de menor altura- nos que se ubican, ben as dependencias comunitarias (cociña, lareira, forno...), ben un alpendre ou corte sobre o que se levanta a palleira (a solución máis habitual nas aldeas das terras altas). Efectivamente, aquí adóitase utilizar este tipo de solución volumétrica para ordenar o espacio privado das súas casas-vivenda. Estas, constitúense como unha sorte de complexo agro-residencial que evidencia cal é a principal actividade económica dos seus habitantes: a actividade agro-gandeira.
Esta vivenda, recente restaurada para convertela nunha casa de turismo rural, destaca pola preciosa balconada cuberta de madeira que loce un dos seus laterais. Xunto a esta peza unha galería acristalada de contundente acento contemporáneo que harmoniza perfectamente coa tipoloxía orixinal do inmoble.