Trala confirmación como parroquia en 1959 (ata esa data pertencía á parroquia de Carreira) a Igrexa Parroquial de Aguiño comezou a súa construción cun deseño do prestixioso arquitecto galego Antonio Tenreiro, sendo o primeiro templo da era moderna con inscricións en galego salientando a relevante sona do Vía Crucis, de man do carismático párroco local Francisco Lorenzo Mariño, con aspecto propiamente mariñeiro. O templo foi consagrado o 14 de Xullo de 1967, polo cardeal Quiroga Palacios, dando ese día a súa primeira misa en galego. Tamén se pode salientar a disposición funcional da igrexa, máis larga que longa, permitindo unha capacidade aproximada de 400 persoas, con tres posicións arredor do altar.