O inicio atópase na estrada que une Eixán con Ponterriza. Esta última aldea é digna de visitar, a pesar de situarse fóra de roteiro, pola súa ponte medieval e un cruceiro con gravados de serpes. En Ponterriza tamén hai posibilidade de conexión coa PR-G 79. A senda chega a Eixán e descende para atravesar o río Pedriña, comezando daquela a ascensión cara a Astureses.

O patrimonio que atopamos neste PR-G é importantísimo: o románico nas igrexas de San Xulián de Astureses, Sta. María de Xuvencos e San Martiño de Cameixa e o pazo Almuzara (turismo rural).

A final do traxecto, o carreiro descende cara ás ruínas de Leborín para, entre fermosos camiños flanqueados por antigos muros, desembocar na aldea de Pazos de Arenteiro (ver PR-G 76). Desde esa poboación pódese tomar o  PR-G 79 cara a Ponterriza, a 8 km, pasando por Castro Cavadoso e Moldes e, dese xeito, completar un itinerario circular.