Desde A Ponte das Poldras en Leiro, atravesando o núcleo urbano da capital do concello. A senda ascende ata Lebosende polo chamado Camiño Real, compartido tamén co PR-G 76.

Máis arriba, en Paredes, atópase a área etnográfica “Regacho do Foxo” formada por 6 muíños e 30 hórreos. Desde esta aldea, tomando un desvío indicado por unha frecha xunto a un cruceiro, existe a posibilidade de abandonar o roteiro sinalizado e achegarse por unha pista asfaltada á igrexa de San Tomé de Serantes (S. XII), unha fermosa xoia do románico entre as máis interesantes de toda Galicia.

A senda sae de Paredes por un tramo asfaltado en dirección a Orega. Logo, xira á dereita e se interna por unha singular paisaxe de vexetación autóctona. Neste percorrido, o camiño aproxímase a Valboa e máis tarde alcanza a área recreativa de Pena Corneira, coroada cos espectaculares “cornos” de granito que dan nome a esta formación. É aquí tamén onde se atopa a igrexa románica de Lamas.

Xa fóra do roteiro, hai dous accesos que se achegan respectivamente ao cume de Pena Corneira e ao miradoiro de Outeiral, ambos a máis de 600 metros de altitude e con excelentes vistas sobre a comarca.