Senda circular a partir de Luíntra, capital do Concello de Nogueira de Ramuín, ou desde o Parador e mosteiro de Santo Estevo de Ribas de Sil. Discorre principalmente por camiños e pistas, xeralmente amplas, coincidindo en numerosas ocasións co roteiro 1 para bicicletas do Centro BTT Ribeira Sacra.

As paisaxes varían entre zonas de cultivo moi humanizadas e tupidos bosques de carballos, castiñeiros ou bidueiros. Tamén destacan as vistas desde os magníficos miradoiros sobre o Canón do río Sil ou a impoñente panorámica sobre o mosteiro de Santo Estevo que ofrece o Castro de Litoria,  encumbrado sobre grandes penedos graníticos.

O nome do roteiro Maquino Largaño significa “camiño longo” e é unha homenaxe ao barallete, xerga gremial propia de determinados oficios ambulantes, especialmente dos afiadores e paragüeros, utilizada con finalidade críptica e moi implantada outrora nesta zona.