Desde a ponte da Gándara, a senda descende xunto ao leito do Rego das Gándaras nun percorrido con suaves desniveis e remonta os ríos Tambre e Cabalar ata A Ponte do Sapo, permitindo gozar dunha contorna que serve de marco para un belo conxunto etnográfico formado por numerosos muíños e un batán.

Este traxecto inferior a 6 km visita 22 muíños hidráulicos en diferente estado de conservación. Así como o batán de Mezonzo, actualmente restaurado, que servía para golpear repetidamente produtos téxtiles como feltros e tecidos, co fin de darlles maior firmeza e resistencia. Crese que a orixe deste batán pode estar relacionado co mosteiro de Mezonzo do século XII, polo que podería ser un dos máis antigos da península.

O carreiro rodéase de frondosa vexetación, creando un ecosistema húmido e fresco todo o ano, Tamén acolle numerosas árbores de ribeira, en especial amieiros, salgueiros, bidueiros e abeleiras.