A senda discorre polo linde entre as provincias de Ourense e Zamora. Iníciase o traxecto na Portela da Serra Calva (1.520 m), tamén coñecida como As Lagoas das Tablillas, no límite do Concello da Veiga e o municipio zamorano de Porto de Sanabria. Neste punto hai unha zona de observación astronómica, xa que o lugar goza dun ceo amplo e sen contaminación lumínica.

O percorrido discorre xunto a moitas pequenas lagoas estacionais que reciben o nome de lagoallos. A presenza destes pequenos lagos e zonas encharcadas (chamadas brañas) é a mostra do pasado glaciar destes montes.

A senda visita as lagoas glaciares de Ocelo e da Serpe, así como as praderías e os restos dos chozos utilizados antigamente polos gandeiros. Desde O Escavadoiro, o roteiro sobe xunto ao río Xares ata case o seu nacemento. Logo, conecta con outros carreiros para achegarse ao cume de Pena Trevinca.

O trazado da Integral da Serra Calva acumula 21 km, pero hai que reservar forzas para cubrir a mesma distancia no traxecto de volta. Ou baixar ata Vilanova ou á Ponte mediante outros sendeiros conectados.