Trazado paralelo ao río Sor. A contorna é un bosque de ribeira atlántico de frondosa vexetación onde predominan bidueiros, amieiros, loureiros, castiñeiros e carballos, así como diferentes especies de fentos. Protexido por unha feraz natureza, o Sor pode presumir de ser rico en peixes, cuns 16 quilómetros acoutados para a pesca deportiva. No traxecto atoparemos ata cinco refuxios para pescadores, construídos sobre antigos muíños en bo estado de conservación.

Desde o miradoiro de Augas Caídas e o refuxio de O Couce, a senda descende vertixinosamente ata o río e logo ascende lentamente en dirección ao refuxio de Salustio. Este tramo, duns tres quilómetros, é o máis natural e escarpado do roteiro, polo que é importante levar bo calzado e camiñar con precaución. O resto do carreiro é máis suave e permite ser percorrido mesmo en bicicleta.

Na área recreativa de Ponte Segade, atopamos o complexo de lecer máis completo de todo o itinerario. Dispón de numerosas mesas e dunhas cantas grellas para cociñar. Conta tamén con servizo de hostalería, parque infantil, praia fluvial e instalacións para os bañistas, con servizos hixiénicos e duchas.

RECOMENDACIÓNS

Precaución no tramo de Augas Caídas a Fonte Cubelas, especialmente con nenos.