Desde a coidada e fermosa praia fluvial do Chao de Pousadoiro, o carreiro ascende suavemente pola marxe esquerda do río Eo, entre bosques de ribeira e campos de labor. Nos lugares nos que o leito do Eo é angosto, a vexetación vólvese máis tupida e fórmanse bosques de carballos e outras caducifolias.

Tras atravesar as desembocaduras dos afluentes Salgueiro, Rendide e Castro, a estreita senda de pescadores alcanza a ponte colgante de Coado de Lamas. O itinerario non cruza o río, pero recoméndase atravesar a pasarela para gozar das vistas.

Máis adiante, o roteiro termina tras cruzar a ponte de Montefurado. A escasos 50 metros é recomendable visitar o muíño coñecido como Muíño de García. Xunto a este existen dous túneles que traen as augas do río Rodil, un deles relacionado coa explotación aurífera en época romana.

RECOMENDACIÓNS

Non se aconsella en épocas de choiva, temporais ou crecidas do río.