Da praia de Montalbo á de Magor

O sol do Salnés

No concello de Sanxenxo, xunto á praia de Montalbo, atopamos o punto de partida desta ruta. Dirixirémonos en primeiro lugar cara a punta Montalbo que, cos seus 57 m de altura sobre o mar, convértese nun lugar de excepción dende o que contemplar gran parte da ría de Pontevedra así como as Illas Cíes, cabo Home e ata cabo Silleiro.

Dende aquí o sendeiro levaranos primeiro ata a praia nudista de Bascuas e despois ata a de Pragueira. Poderemos agora separarnos un pouco da liña de costa para achegarnos ata un miradoiro próximo para observar as Illas Ons situadas xusto fronte a nós e que, ao igual que as Illas Cíes, forman parte do Parque Nacional Marítimo-Terrestre das Illas Atlánticas.

Para rematar o noso paseo continuaremos ata a praia de Magor, que limita na súa marxe esquerda con punta Faxilda e conta cun complexo dunar protexido por unha pasarela de madeira que nos facilitará o paseo ata o final deste areal.