De Cabo de Cruz á punta do Chazo

O lado máis mariñeiro de Boiro

Un roteiro con sabor a mar que en pouco máis de 3 km combina treitos de asfalto, con pasarelas de madeira, camiños empedrados e carreiros.

Dende o peirao vello de Cabo de Cruz, no que podemos observar tradicionais embarcacións pesqueiras collemos cara á praia da Ribeira Grande atravesando barrios mariñeiros cheos de cor. Antes de pasar á praia de Piñeirón podemos ver na punta un cruceiro-capela sobre as rochas, que forma parte do roteiro marítimo xacobeo. De seguido alcanzamos a praia de Carragueiros co seu cordón dunar.

No seu remate, a pena Roiba cos illotes dos Baos e Bensa, dá paso á praia da Retorta, xunto a un parque acuícola. Aquí o paseo tórnase nun sendeiro que de contado nos leva ata a punta do Chazo coa pequena capela do Carme, onde remata o percorrido.