Esta área recreativa, situada a 20 km do Cádavo, capital do concello de Baleira, conta cun pequeno sendeiro circular que bordea os meandros do río Eo e arrodea a chamada pena da Volta. Na súa cima unha escultura de San Francisco de Asís, o santo amigo dos animais e a natureza, preside e protexe este privilexiado enclave natural. 

Dende a súa altura, un pouco máis próximos ao ceo, enxérgase unha ampla paisaxe. Tamén dende aí poderemos contemplar os restos das numerosas ouriceiras que había na zona, coñecidas localmente como corrizas, e que son construcións que servían para o almacenamento e afumado das castañas. Tamén vemos unha acea ou muíño de río que aínda conserva restos da maquinaria. 

Como se trata dunha área de recreo, conta tamén cunha zona de merendeiro e, xunto a ela, uns chanzos que nos levan ao alto dun montículo sobre o que se recreou un hórreo de planta cadrada sobre pilares e con tellado de pizarra a catro augas, tipoloxía propia da zona.