Este paseo ten o seu inicio na ponte medieval de Comboa, formada por tres arcos dos que os laterais manteñen o medio punto mentres que o central é lixeiramente apuntado, e que data dos séculos XIII-XIV. Dende aquí percorreremos un sendeiro curto e de baixa dificultade que discorre, principalmente, entre árbores autóctonas de ribeira seguindo o río Verdugo. Aínda que todo o paseo é moi agradable, a verdadeira sorpresa prodúcese ao chegar á ponte colgante, baixo a que podemos ver unha profunda poza coñecida como a poza das Bestas e unha pequena praia fluvial que a converten nunha interesante paraxe.

A partir de aí seguiremos camiñando uns metros, agora á beira do río Oitavén, ata chegar a un antigo muíño para volver despois sobre os nosos pasos e facer o camiño de volta.