Aínda que esta ruta nos levará ao pé mesmo da fervenza, é recomendable desviarse uns metros para visitar primeiro os miradoiros do Toxa que, construidos sobre enormes rochas, son un lugar de excepción dende o que contemplar o salto de auga e a confluencia dos ríos Toxa e Deza.
Despois de desfrutar das vistas, encamiñaremos os nosos pasos cara ao corazón do cadoiro descendendo entre castiñeiros, carballos, sobreiras ou loureiros na parte media alta do camiño e, xa nas ribeiras do río, entre salgueiros, amieiros ou freixos.
Unha vez chegamos ao noso destino, entre un sobrecolledor estrondo e unha intensa brétema, consecuencia ambas as dúas da forza da auga, admiramos sobre as nosas cabezas esta ruxidoira que, cos seus 30 m de caída vertical, é unha das máis altas de Galicia. Unha área de descanso neste mesmo lugar, con mesas e bancos de pedra, invítanos a facer un pequeno descanso para coller forzas antes de iniciar o camiño de volta.