Este paseo parte da ponte da Chanca e levaranos a carón do río Rato entre zonas de campo aberto, hortas e bosque autóctono, con carballos, freixos ou álamos. 

Toda a zona foi recentemente recuperada e construiuse un carril bici que discorre en paralelo á senda peonil. Durante o traxecto atoparemos bancos, pontes, fontes e incluso pequenas fervenzas, e poderemos observar ras, patos, garzas reais ou mirlos acuáticos. Atoparemos tamén o Centro de Interpretación da Reserva da Biosfera Terras do Miño, ubicado nunha casa-muíño do século XIX coñecido como o muíño do Tendeiro. Nel poderemos visitar unha exposición audiovisual sobre a etnografía, historia, paisaxe e cultura da auga, e tamén informarnos sobre as numerosas actividades relacionadas coa natureza que se poden realizar na contorna. 

O río Rato conflúe co río Miño nas proximidades desta ruta, o que nos permite prolongala e camiñar varios quilómetros máis á beira do río máis longo e coñecido de Galicia.