Comezamos o noso paseo descendendo por un sendeiro, rodeado por un frondoso bosque, que nos levará ata o nivel do río onde atoparemos o primeiro dos muíños restaurados. É aí onde comeza a pasarela de madeira que nos permitirá percorrer comodamente esta preciosa paraxe fluvial, bordeando o río Valga.

Despois de camiñar uns metros xa podemos ver a primeira e principal fervenza que cae formando unha poza na que, se o tempo acompaña, poderemos aproveitar para darnos un baño. Xunto a ela atopamos unhas escaleiras de madeira que nos levarán ata un segundo muíño e ata a segunda das fervenzas, onde poderemos desfrutar dese pequeno salto de auga antes de emprender o camiño de volta.