Vereas castrexas entre carballos

Comezaremos este paseo no adro da antiga colexiata de Xunqueira de Ambía, xoia do románico galego, para seguir as pegadas dos peregrinos que percorren a Vía da Prata. Ao pouco de saír da vila colleremos unha pista á dereita que baixa ata preto do río Arnoia. Seguindo a súa marxe esquerda veremos arruinados algún muíño, e o son do río acompañaranos ata a aldea de Acea, no concello de Baños de Molgas.

Por entre bosques de carballos unha verea sobe ata o Outeiro do Castro, pasando ao pé dun castiñeiro senlleiro. A ruta remata na croa do castro, onde recentes escavacións descubriron varios hórreos do tempo dos moradores castrexos, caso único en Galicia, e unha vivenda. Dende aquí albiscamos a figura da colexiata e a contorna. O camiño ao castro tamén se pode facer tanto dende a aldea de Acea como dende a estrada que une Xunqueira de Ambía con Baños de Molgas, sendo neste caso un paseíño doado de apenas 700 m planos, polo que é ideal para facelo en familia.

Colexiata de Xunqueira de Ambía (42°12'15.47"N / 7°44'06.96''O)

Cruce estrada OU-0108 (42°12'32.94''N / 7°43'19.18''O)