Dende A Fonsagrada  colleremos a estrada LU-721 en dirección ao val do río de Lamas. Antes de chegar ao lugar de Vilagocende atoparemos, no lado esquerdo, unha pequena zona de aparcadoiro onde poder deixar o coche para seguir o camiño que descende a man dereita. O percorrido ata a fervenza ten apenas 1 Km e discorre por unha contorna de bosque autóctono de ribeira, con carballos, bidueiros e ameneiros, que non anticipa a grata sorpresa que recibiremos ao chegar á espectacular  seimeira, nome co que se coñece ás fervenzas nesta zona. Unha vez no final do camiño, poderemos ver como se precipita ao río da Porteliña en todo o seu esplendor, formando este cadoiro de 54m de altura considerado un dos máis altos de Galicia en caída libre.

Unha vez aos pés da seimeira, unha pasarela de madeira permitirá que nos aproximemos un pouco máis.