Esta fervenza atópase no río Búbal, que nace entre os concellos de San Cristovo de Cea e Vilamarín e desemboca no río Miño. Para chegar ao punto de inicio da ruta que nos levará ata ela tomamos a estrada LU-P-1001 que vai dende Os Peares ata A Barrela. A uns 2 quilómetros veremos unha pista de terra cunha sinalización que indica dirección a Carcacía e seguiremos por ela ata chegar a unha canteira abandonada. Xunto a ela pasa o río e, como non hai ningunha ponte, teremos que descalzarnos para poder cruzalo. Comezaremos o ascenso pola marxe esquerda, por un sendeiro bastante escondido pola vexetación e con bastante pendente, e no noso camiño iremos atopando pequenos saltos de auga. 

Despois de superar un forte desnivel chegaremos á parte superior da fervenza de maior altura. Con moito coidado, polo perigoso e exposto do sitio, poderémonos asomar para ver como a auga abriu un pequeno canón entre as rochas e se precipita a través del dando lugar a unha poza na parte inferior. Se queremos sacar fotografías da fervenza coa súa poza teremos que descender pola ladeira do monte, pero trátase dunha baixada moi arriscada e técnica polo que, se non estades afeitos a este tipo de manobras, mellor non intentalo.