Para visitar esta fervenza collemos a estrada N-541 que une as cidades de Pontevedra e Ourense en dirección a Maside. Alí desviarémonos cara ao lugar de Listanco para pasar xunto á igrexa de san Miguel de Armeses e continuar ata a aldea da Casanova.

A partir de aquí teremos que seguir a pé durante aproximadamente 1 Km ata atopar a sinalización da área recreativa e do salto de auga. Unha vez no río atoparemos unha ponte metálica que nos deixa xusto diante da fervenza, que cae desde 15 metros de altura dando lugar a unha gran piscina natural.

Tras cruzar a ponte, entramos nunha pequena área recreativa. Se subimos ata a marxe contraria chegaremos aos muiños das Penas e, xunto a eles, atoparemos unha pasarela que nos permite ver o salto de auga dende arriba.