Esta é unha desas fervenzas fácil de localizar, pero difícil de ver. O rego de Puga é un afluente do río Miño e para chegar ao salto de auga hai que tomar a estrada OU-402 que une Ourense con Cortegada e desviarse no lugar de Puga cara Paredes e Toén. Pasaremos por Eirexa de Puga e, antes de chegar a Paredes, atoparemos unha ponte xunto á que poder deixar o coche. Dende ese punto poderemos ver unha primeira fervenza, pero o salto de auga principal está máis arriba e para velo teremos que ascender polas rochas, con moita precaución para non esvarar.