Para chegar a esta fervenza collemos a autoestrada A-8 e saímos en Abadín para continuar despois polas estradas LU-P-0107 e LU-P-0101 que discorren pola serra do Xistral cara a parroquia de san Xurxo do Cadramón.

O comezo da ruta que leva á fervenza está sinalizado, e alí deixaremos o coche para camiñar durante 1,5 Km ata chegar a ela. Entre tobogáns, saltos e viravoltas o río Guilfonso debrúzase contra a rocha granítica dende unha altura duns 80 metros, separando os concellos de Alfoz e O Valadouro.

O acceso faise baixando por unhas escaleiras con varandas que facilitan un descenso seguro.

IMPORTANTE: se queremos apreciar a fervenza en todo o seu esplendor podemos axudarnos dunha corda que atoparemos amarrada na rocha e que nos axudará a ascender ata o pé da mesma. Esta aproximación debemos facela con moitísima precaución, xa que as laxes son superficies moi esvaradías.