Para chegar a esta fervenza podemos partir dende Ponte Caldelas pola estada PO-255 en dirección a Verducido e aí coller a PO-9303 cara ao lugar da Eiroa. Outra opción é saír de Fornelos de Montes por esa mesma estrada PO-9303 que sube á serra do Suído. Por calquera das dúas rutas chegaremos ata a Área recreativa da Airoa, onde deixaremos o coche para continuar a pé.

Nese punto atoparemos un panel informativo coa ruta a seguir, polo que non ten perda. En primeiro lugar camiñaremos uns metros ata o cumio do monte, onde atoparemos un banco dende o que poder observar a fervenza de lonxe en todo o seu esplendor. Dende aí descendemos ata o pé da primeira das fervenzas para continuar despois uns metros e ascender ata a segunda. O percorrido non ten dificultade, pero hai que ter coidado de non esvarar, sobre todo en época de chuvias.