No concello de Aranga, pola estrada que vai cara A Igrexa-Mende-Fervencedo, antes de chegar a esta última poboación (Fervencedo) colleremos o camiño que baixa ao río para cruzalo e seguir o curso do mesmo. O acceso non ofrece moita dificultade se queremos ver os saltos de auga dende o camiño principal, pero se queremos subir pegados ao río a dificultade aumenta. A ruta non está sinalizada. O río das Fervenzas ou Bexo é un afluente do Mandeo que nesta zona baixa moi encaixado, dando orixe a varios saltos de máis de 5 m.