A fervenza da Mazoca atópase no río Sesín, afluente do río Eume que desemboca ao pé do mosteiro de Caaveiro. 

Para chegar a esta fervenza debemos dirixirnos ao Parque Etnográfico do río Sesín, no concello da Capela e dentro do Parque Natural das Fragas do Eume. Alí poderemos pasear entre un mesto bosque autóctono e ver varios muíños rehabilitados. Moi cerca está o punto de partida do camiño que nos levará ata este salto de auga. Antes de xuntarse co Eume, o Sesín descende formando varias fervenzas, sendo a máis alta esta da Mazoca cuns 10 metros de altura.