Para chegar a esta fervenza dirixirémonos ao castro de Castrolandín, situado a menos de 1 quilómetro da vila de Cuntis, poboado castrexo fortificado de finais da Idade de Ferro (s.IV a.C-I d.C.). Aí deixaremos o noso vehículo para continuar a pé.

No inicio da ruta atoparemos un cartel informativo coas indicacións para chegar aos diferentes puntos. A partir de aquí seguimos un sendeiro que baixa ata o río da Patela e cruzarémolo por unha pequena ponte de madeira xunto á que atopamos 3 frechas que nos indican as direccións a seguir e as distancias: a fervenza das Campaíñas  (a 200 metros), a fervenza de Hérvedo (a 300 metros) e a fábrica da luz (a 250 metros).

O traxecto discorre por unha pista ancha e sen complicacións pero se queremos baixar ao pé do salto principal, duns 8 metros de altura, teremos que camiñar uns metros máis para coller un pequeno sendeiro que sae á man dereita. Baixaremos ata o río e retrocederemos uns metros para chegar á fervenza das Campaíñas.

IMPORTANTE; este último tramo é estreito e sombrío, polo que debemos extremar a precaución sobre todo en época de chuvias.