Para chegar a esta fervenza dirixirémonos ao castro de Castrolandín, situado a menos de 1 quilómetro da vila de Cuntis, poboado castrexo fortificado de finais da Idade de Ferro (s.IV a.C.-I d.C.). Aí dexaremos o noso vehículo para continuar a pé.  

No inicio da ruta atoparemos un cartel informativo coas indicacións para chegar aos diferentes puntos. A partir de aquí seguimos un sendeiro que baixa ata o río da Patela e cruzarémolo por unha pequena ponte de madeira xunto á que atopamos 3 frechas que nos indican as direccións a seguir e as distancias: a fervenza das Campaíñas  (a 200 metros), a fervenza de Hérvedo (a 300 metros) e a fábrica da luz (a 250 metros). 

Remontaremos o río da Patela, chegando en primeiro lugar á fábrica da luz da que só quedan os restos dos seus muros e os restos da maquinaria. Dende aquí continuaremos subindo xunto ao río para chegar ao pé da fervenza de Hérvedo.