Para chegar a elas seguiremos as indicacións existentes no concello do Rosal. Trátase de dous afluentes do río Tamuxe, que baixa desde o monte San Martiño, creando varios saltos de auga por riba das formacións  graníticas. A auga é aproveitada por un conxunto de muíños encadeados de gran interese etnográfico e estético.  Dependendo do rego ao que pertenzan, divídense en  Folón e Picón. Existe un roteiro de sendeirismo circular que nos achega a estes dous conxuntos de muíños e, durante o percorrido, hai varios miradoiros con vistas á zona do Rosal e do estuario do Miño.