Desde o Carballal sóbese pola rúa Subida ao  Pardiñeiro. Alí collemos o sendeiro da Fraga de Coiro, que cruza por arriba o corredor  do Morrazo  CG-4.1. Chegaremos a unha bifurcación de camiños, onde colleremos o da esquerda. Pasaremos por unha zona onde se talaron todas as árbores, o que nos deixa unha visión panorámica de Cangas do Morrazo e ao fondo as illas Cíes. As pedras presentes en todo o camiño adoptan formas caprichosas, sempre cubertas de musgo. Destaca a mítica Pedrahedra ou " Pedra dos Fuxidos", lugar onde se escondían os veciños durante a guerra civil.  Atopamos entón as fervenzas, no río Bouzós, que no seu descenso pasa á beira duns 30 muíños e desemboca conxuntamente co rego das Presas na praia de Rodeiro, en Cangas. Existe un carreiro de baixada, que atravesa o Sendeiro do Carballal de  Coiro. Por iso é polo que estas fervenzas son coñecidas tamén como fervenzas de Coiro. O camino ata chegar a elas está balizado.